A silenciosa desaparición do crucifixo nas tomas de posesión do Goberno galego

Tomas de posesión de Laxe, Touriño e Feijóo CC-BY-SA Praza Pública

Un dos momentos máis tensos da turbulenta vida política galega na segunda metade dos anos 80 foi a votación da moción de censura contra o Goberno de Alianza Popular, aquela en cuxo debate Mariano Rajoy anunciara que se dispuña a "abandonar a vida política" dentro de "pouco" tempo. Tras a ruptura da dereita galaica os votos de PSdeG, Coalición Galega e PNG fixeron presidente o socialista Fernando González Laxe. A toma de posesión daquel 29 de setembro de 1987 ficou amplamente reflectida nos xornais do día seguinte e, por exemplo, na prensa local compostelá, atacábase duramente o novo presidente pola ausencia do crucifixo na súa promesa do cargo. Durante estas tres décadas o símbolo católico apareceu e retornou neste tipo de actos, e a última desaparición aconteceu, sen anuncios previos nin comentarios posteriores, co actual Goberno galego.

Durante o fraguismo a cruz presidiu os actos de toma de posesión do presidente e mais dos conselleiros, uso e costume que se mantivo ata agosto de 2005, coa elección do Goberno bipartito. Como fixera González Laxe, o 2 de agosto o daquela líder do PSdeG prometeu o cargo no Parlamento sobre senllos exemplares da Constitución e do Estatuto de Autonomía, sen a presenza do crucifixo e sen un exemplar da Biblia. Do mesmo xeito, dous días despois o vicepresidente, Anxo Quintana, e os conselleiros e conselleiras asumiron as súas novas responsabilidades no Pazo de Raxoi ante a representación as leis fundamentais de Galicia e do Estado, sen simboloxía católica.

González Laxe foi duramente criticado pola ausencia da cruz na súa toma de posesión; o símbolo volveu durante o fraguismo e desapareceu co bipartito

O retorno do crucifixo a estes actos oficiais do Goberno produciuse en abril de 2009, no retorno do PP ao poder da man de Alberto Núñez Feijóo, que asumiu a Presidencia coa cruz, a Biblia, o Estatuto e a Constitución como testemuños. O mesmo fixeron os restantes dez compoñentes do seu primeiro Consello da Xunta. En 2012 a escena repetiuse tanto na toma de posesión do presidente como na do vicepresidente Rueda e restantes conselleiros. Tamén houbo Biblias e crucifixos nos actos de toma de posesión de cargos intermedios e mais na da conselleira Ethel Vázquez, que en xuño de 2014 substituíu a Agustín Hernández á fronte de Medio Ambiente, Territorio e infraestruturas.

A toma de posesión de Ethel Vázquez celebrouse tan só vinte e catro horas antes doutra que ocupou todos os titulares da prensa: a de Felipe de Borbón, coroado ante as Cortes como novo rei de España. Un detalles resaltados desa proclamación foi a ausencia do crucifixo xunto ao cetro e a coroa que representan a Casa Real española.

Nas tomas de posesión de 2009 e 2012 o crucifixo estivo presente, e nas que se celebraron tras a coroación do rei, que a desbotou, xa non estivo

Causalidade, casualidade ou non, o certo é que o seguinte acto de toma de posesión que se celebrou no Goberno galego, o dos conselleiros Valeriano Martínez e Román Rodríguez como novos responsables de Facenda e Educación, en febreiro deste 2015, non estivo presente a cruz, aínda que si a Biblia ao carón dos textos legais. O mesmo sucedeu o pasado luns, no acto en que se fixo oficial a crise de goberno decretada polo presidente, coa reestruturación do Executivo e a chegada de tres novos conselleiros. Estas ausencias non suscitaron, cando menos polo momento, crítica ningunha.

A Xunta especifica que non existe ningunha norma ao respecto

Esta silenciosa desaparición da cruz nestes actos prodúcese nun contexto no que o partido que sustenta o goberno non aforrou críticas ás forzas que, nos últimos meses, decidiron desligar os concellos e outras institucións de eventos confesionais. Mentres, fontes do Goberno galego consultadas por esta redacción indican que non existe unha norma ou criterio específico para a presenza de simboloxía relixiosa nas tomas de posesión, cuxa retirada foi desbotada no Congreso dos Deputados no marco dunha votación en maio de 2008.

Tomas de posesión de Laxe en 1987 e de Touriño e Quintana en 2005 © TVG
Toma de posesión de Feijóo en 2012 © Ana Varela

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.